Dalalka Midowga Yurub oo bilihii ugu danbeeyay waday fududeynta xannibaaddihii uu keenday cudurka coronavirus ayaa waxa ay ka wada hadlayaan in xannibaad la saaro dadka ka imanaya dhowr dal oo Mareykankana uu ka mid yahay. Arrintan ayaa waxa ay dood ka furtay xiriirka Maraykanka iyo Midowga Yurub u dhexeeya maadaama ay dalalka qaar u oggolaadeen in ay Yurub soo geli karaan.
Iyada oo ay jiraan dalal badan oo ka mid ah adduunka oo weli la daalaa dhacaya cudurka coronavirus, Midowga Yurub waxa uu ka shaqaynayaa sida waddamada xubinta ka ah ay ugu heshiin lahaayeen siyaasadaha lagu maarayn karo dadka Yurub soo galaya si looga hortago halis caafimaad oo ka iman karta dadka safarada ah ee qaaradda soo geli doona. Yurub dalalkeeda ayaa badankood waxa ay safarada dibadda aqbali doonaan wixii laga billaabo toddobaadka koowaad ee bisha Luulyo.
