Ilo ku dhow dhow qoyska madaxweynihii geeriyooday ee Burundi ayaa xaqiijiyay in dhimashadiisa ay daba socotay kaddib markii uu ku dhacay cudurka Covid-19.
Xaaskiisa oo uu cudurka ku dhacay ayaa xilliga ay geeridiisa timid lagu daweynayay waddanka Kenya.
Warbaahinta SOS oo arrintan daaha ka qaadday ayaa dib u eegis ku soo sameysay dhammaan dhaqdhaqaaqyadii uu sameynayay madaxweynaha, ka hor inta aan lagu dhawaaqin dhimashadiisa.
Dowladda Bujunbura ayaa horaantii isbuucan sheegtay in Pierre Nkurunziza uu wadnaha istaagay, iyadoo aan ka hadlin inuu fayraska qabay iyo inkale.
Nkurunziza ayaa la soo tabiyay inuu sahashanayay khatarta cudurka Covid-19, isagoo amar ku bixiyay in la sameeyo ol’olaha siyaasadeed iyo doorashadii xigtay ee uu ku damacsanaa inuu xilka iska wareejiyo.
Waxaa lagu dhaliilay inuu dhagaha ka fureystay talooyinka ay u jeedinayeen mas’uuliyiinta caafimaadka ee Burundi, ee ku saabsanaa digniinaha la xiriira fayraska.
Haddii ay dowladda Burundi xaqiijiso arrintan, Pierre Nkurunziza wuxuu noqon doonaa madaxweynihii ugu horreeyay ee u geeriyooday cudurka Covid-19.
Wax yar ka hor dhimashadiisa, waxaa lagu soo warramay in Nkurunziza uu caawinaad caafimaad ka dalbaday dhakhaatiirta ugu sarreysa waddanka Burundi.
Pierre Nkurunziza wuxuu dalka Burundi madaxweyne kasoo ahaa muddo 15 sano ah, haddana waxaa lagu waday inuu madaxweynaha cusub ee la doortay xilka ku wareejiyo bisha August.
Sanadkii 2015-kii ayuu qalalaase horseeday kaddib markii uu xilka isu soo taagay markii sdadexaad, taasoo xilligaas loo arkayay inay ahayd tallaabo ka dhan ah dastuurka waddankaas.
Isniintii ayaa la xaqiijiyay geerida Nkurunziza, kaddib markii in muddo ah laga waayay fagaareyaasha.
Wali ma cadda cidda la wareegeysa xilka madaxwetnaha, ilaa inta laga gaarayo waqtiga dastuuriga ah ee uu madaxweynaha la doortay xafiiska tagayo.
Hase ahaatee, dastuurka dalkaas ayaa dhigaya in haddii uu madaxweynaha meesha ka baxo uu booskiisa galayo afhayeenka baarlamaanka.
Qaar ka mid ah dalalka Bariga Afrika ayaa ka falceliyay geerida madaxweynaha Burundi.
Madaxweynaha Kenya, Uhuru Kenyatta, ayaa amar ku bixiyay in hoos loo dhigo calamada qaranka iyo kuwa urur goboleedka Bariga Afrika (EAC) ee guud ahaan dalkiisa.
Laga billaabo maalinta Sabtida ah ayey calamadaas iyagoo haaf ah babban doonaan, waxayna arrintaas socon doontaa ilaa inta laga aasayo Mr Nkurunziza.
Tallaabada ayuu madaxweyne Kenyatta ku tilmaamay mid lagu sharfayo madaxweynaha geeriyooday ee Burundi.
Warbaahinta maxalliga ah ee Kenya ayaa tabinaya inuu xiriir saaxiibtinnimo oo aad u dhow ka dhexeeyay Kenyatta iyo Nkurunziza.
BBC
